嫁接睫毛前必須知道的二三事 整錯睫毛大件事!隨時電眼美人做不成慘變 Miss Piggy!
Beauty Blog

嫁接睫毛前必須知道的二三事 整錯睫毛大件事!隨時電眼美人做不成慘變 Miss Piggy!

前陣子,小編見同事植眼睫毛植得鬼咁靚,自己貪得意又整下,點知一整就出事!幻想自己成為電眼美人嘅美夢泡湯,一開眼望鏡第一個反應係:「嘩!乜咁似 Miss Piggy 嫁!」初時以為返到屋企睇睇下會順眼番,可惜慘被另一半彈到一棟都無,小編唯有即刻走去最就近嘅美睫店拆都拆唔切。美睫師話:「嫁接睫毛最緊要揀番適合眼形嘅長度、粗幼度同弧度,揀唔啱就會好怪相!」經過今次教訓,小編真係長知識!為免大家好似我咁中伏,綜合左以下 7 個重點,大家必須要嚮做  Eyelash extension 前了解清楚。

 

#1 嫁接睫毛嘅長度

一般嫁接嘅睫毛長度從 5mm 去到 15mm,唔同長度嘅睫毛嫁接嚮唔同位置會有唔同嘅視覺效果 (下一 part 「嫁接睫毛的長短分佈」會講到)。 專業美睫師會因應每個人嘅眼形大小建議最合適嘅睫毛長度,以免嫁接效果唔夠明顯又或者過分誇張。

#2 嫁接睫毛嘅長短分佈 

想營造自然 (natural) 效果,用嘅睫毛長度大約 6-11mm,較適合每日返工唔多化妝但又想望落精神啲嘅 OL 一族。

想營造戲劇性 (dramatic) 效果,用嘅睫毛長度大約 8-12mm,適合平時會化下清麗妝先出街嘅女仔整。

  

去 party 要化濃妝,又想有對 sexy 嘅迷人電眼,用嘅睫毛長度就要用到 13-14mm,而且睫毛要從眼頭由短至長排列至眼尾,營造尖長嘅貓眼 (cat eye / kitten) 效果。

 

如果一向走日系 cutie 路線嘅女仔,用嘅睫毛最長要用到 11-12mm,睫毛要從眼中央由長至短分別排列至眼頭及眼尾,以營造圓大嘅娃娃眼 (doll eye) 效果。

#3 嫁接睫毛嘅粗幼

講到睫毛嘅粗幼,如果本身睫毛較少較幼,建議用 0.10mm 左右就可以嘞,千祈唔好貪心以為越粗會越濃密越靚,因為自身睫毛較少較幼,仲要好嫁接咁重嘅假睫毛上去,眼皮會不勝負荷之餘,仲會令自身睫毛支撐力不足而倒插入眼嫁!如果本身睫毛健康,選擇粗度 0.15mm 或  0.2mm 以上一般都無問題嘅。

#4 嫁接睫毛嘅捲曲程度

嫁接睫毛嘅捲曲程度主要可以根據幾個英文字母嘅形狀 J、C、D 和 L 去選擇。

J-Curl 係同人類睫毛最相似嘅款式,適合日常化妝; C-Curl 適合想強調眼妝嘅女仔使用;L-Curl 捲曲度最強,一般 party 化濃妝適用。

好多女仔對嫁接睫毛都有誤解,以為越長越粗嘅睫毛會令眼睇起上黎更大。美睫師一語道破:「如果唔配合本身眼形,用過長過粗嘅睫毛,會令睫毛過重向下壓,反而令眼睇起上黎更細。」

美睫師建議:單眼皮女生可以揀捲曲程度 L,如揀 J 睫毛太輕會向下垂,眼睇起上黎更加細;內雙眼皮女生可以揀捲曲程度 C 或 D;雙眼皮女生就最幸運,任何捲度都適合。

#5 嫁接睫毛後保養

嫁接睫毛嘅效果平均維持到三到四個星期,而想維持耐少少,平日就唔好成日用手捽眼嘞。成日捽眼,假睫毛當然會更易脫落啦!

#6 嫁接睫毛嘅清潔護理

如果搽左 mascara 要落妝,就要用棉花棒沾卸妝液慢慢做清潔而唔好用化妝棉用力抹嘞。

另外,最好用水狀清潔產品,而非油狀。因為睫毛膠水一般屬油溶性,用無油清潔產品就可以有效延長睫毛持久度。

#7 嫁接睫毛店舖嘅選擇

奉勸大家千祈唔好貪平,同見 ig / facebook 相幾靚就隨便去試整睫毛。有店舖會用假相同優惠吸客,美睫師嘅專業操守、店舖環境及工具嘅衛生情況往往不如理想,無事由自可,有起事上黎隨時得不償失,仲有機會致盲添嫁,所以絕對唔好掉以輕心呀!

(部分資料來源:naver.com , zenithnews)