6 點測試你是否 Gel 甲成癮患者 Gel 甲會上癮?整過一次返唔到轉頭?
Beauty Blog

6 點測試你是否 Gel 甲成癮患者 Gel 甲會上癮?整過一次返唔到轉頭?

小編一向唔太貪靚,所以無整甲嘅習慣,亦唔明白點解咁多女同事會整咗 gel 甲連打字都打唔到,汽水罐都開唔到,都係要 keep 住整。前排,去飲宴貪得意整 gel 甲,先知整咗一次原來真係返唔到轉頭嫁,見慣手指甲五顏六色,突然無色,真係周身唔聚財呀!以下 6 點,即刻測試你係咪同我一樣已經成為咗「gel 甲成癮患者」啦!

Gel 甲成癮症特徵 1:唔想再見到自己真實嘅指甲

每次整咗一排 gel 甲,見自己啲指甲慢慢生返出黎,就會越睇越唔順眼。以前可能忍到生返 4mm 先去整甲,依家生返 2mm 已經忍受不了。

Gel 甲成癮症特徵 2:會原諒自己打字速度慢咗

做咗 gel 甲之後,經常會因為 gel 甲長度而唔可以用指尖打字,而要改用敏感度較低嘅指腹打字,打字速度自然慢咗,仲會成日打錯字添。不過,為咗靚,好多女仔好似我咁,對自己嘅包容度突然變得寬鬆。打錯字?唔緊要啦,咪再打過囉,好閒啫!但係,老闆對你嘅容忍力一般就無咁強嘞,所以姊妹們,睇路呀!

 

Gel 甲成癮症特徵 3:牙簽用得比平時多

指甲長咗,每次搽 cream 搽粉底搽 lotion 全部都卡晒嚮甲縫度,所以不時都要用牙簽將污糟野挑返出黎,以保甲縫清潔。而小編近日發現 even 剝蝦殼、食蟹及搣生果皮都有同樣問題,但依然無阻我繼續整 gel 甲。所以話,女人為咗靚,真係可以去到好盡!

Gel 甲成癮症特徵 4:經常搵人開汽水罐

由於 gel 甲有一定厚度,因此要剔起汽水罐嘅拉環係有一定難度嘅,如果身邊有人,一般都叫身邊人待勞;如果恰巧身邊無人,小編就真係無所不用其技,例如就地取材用叉用刀剔起拉環啦,又試過用眉鉗啦,更過分係試過用縫紉拆線刀。縱然生活遇到種種不便,亦無阻我整 gel 甲嘅雅興!

Gel 甲成癮症特徵 5:手機內存有海量 IG 美甲款式 screencap

每次整 gel 甲都整唔同款式是常識吧!一般而言,小編現時會 keep 住一個月整一次,唔 screencap 定十張八張美甲款式 IG 靚相,到時先慢慢嚮美甲店左揀右揀就嘥晒美甲姐姐啲寶寶時間啦!所以身為「gel 甲控」, screencap 海量 IG 美甲款式絕對係指定動作!

 

Gel 甲成癮症特徵 6:不停搵機會幫 gel 甲影相

咁辛苦坐幾個鐘先完成個 gel 甲,一出門口小編通常都會忍唔住即刻幫 gel 甲影相,再 send 俾同事朋友問下佢哋整得靚唔靚咁啦,目的都係想得到人肯定咁啫!

為咗想 post 出 Facebook 同 Instagram 呃下 like,對相片要求變得越黎越高,開始不停搵唔同嘅 props 例如香水樽、靚水杯及名牌銀包等襯托下黎影相。能夠幫 gel 甲曝光嘅機會,無一個會放過,拎住杯紅酒又影、屋企噴香水又影、見到餐廳檯布襯色又影、連酒店廁所嘅雲石牆都不能幸免呀!

以上 6 個 gel 甲成癮症特徵,你又中咗幾多樣?如果同小編一樣全中嘅話,咁絕對有理由相信,你都係「gel 甲成癮嚴重患者」,真係一日 gel 甲,一世都要 gel 甲嘞!