10 個男人 9 個 Dislike 短髮女? 長直髮、曲髮、波浪髮 、及膊髮、超短髮 男人會點揀?
Beauty Blog

10 個男人 9 個 Dislike 短髮女? 長直髮、曲髮、波浪髮 、及膊髮、超短髮 男人會點揀?

10 個男人真係 9 個鍾情長髮女生?小編曾經問過不少身邊男性朋友,到底係咪鍾意留長頭髮嘅女仔多啲,答案呼之欲出,比例以 9:1 大比數拋離取勝。

隔咗幾年再試下問,睇下男仔嘅審美觀會唔會有任何改變先!

即刻黎做個小小調查,訪問下身邊幾位男性朋友 ,實行黎個「出賣朋友」系列先!

#1 日本國民女神新垣結衣

Mercy Beauty: 眼前 4 個髮型,邊個最吸引到你?點解?

Alex (36 , 會計師) 比較鍾意左上中長髮嘅佢,其實都有猶豫揀唔揀右下好,感覺幾清純,不過如果整呢個頭但又唔化少少妝就會好似「村姑」!左上少少自然微曲幾好,唔會太過細路女,有番少少女人味。

#2 綾瀨遙

Mercy Beauty: 眼前 4 個髮型,邊個最吸引到你?點解?

Kelvin (30+ , 攝影師) 我專業影相角度會㨂右下短髮,因為佢係綾瀨遙,眼鼻口都精緻,短髮最可以突顯化佢五官、最上鏡嘅。不過,如果要揀個做女朋友嘅話,我會揀左上長髮梳整齊馬尾,感覺好乾淨,又有少少 elegant,而且夠襟睇最重要吖嘛!

#3 石原里美

Mercy Beauty: 眼前 4 個髮型,邊個最吸引到你?點解?

Justin (30+ , IT ) 其實我唔知石原里美係邊個,不過就咁睇,一眼望埋去,我相信大部分男仔都應該同我一樣:識揀梗係揀左下長髮,帶少少性感 wave 嗰個啦!不過,可能未必完全因為髮型問題,而係主要因為我視線望低左啦!但係右下真係完全唔 ok,好似阿姨!我對上面兩個感覺唔大,正正常常咁啦,睇完就即刻無印象。

#4 全智賢

Mercy Beauty: 眼前 4 個髮型,邊個最吸引到你?點解?

Nick (38 , 辦工室助理) 諗起全智賢,我淨係記得<我的野蠻女友>入面嘅佢,超長直髮,又烏黑又柔順,好似瀑布咁,好有氣質呀!佢令我諗返起我初戀情人,當初都係俾佢把長髮吸引左… (下刪 500 字談及初戀情人) 個人認為,其他髮型似乎都唔多襯佢。

#5 宋慧喬

Mercy Beauty: 眼前 4 個髮型,邊個最吸引到你?點解?

Damien (28 , 市場部主任) 我鍾意啲好女仔嘅女仔,唔知你明唔明我講邊種。即係會化妝扮靚,好 girly 嗰種呢!就眼前呢 4 個造型黎講,左上或右下我都 ok長曲髮就女人味又有少少 sexy長直髮,唔洗問阿貴,係男人都應該鍾意啦!一定要二揀一,我會揀長直髮,因為我個樣較 young 又唔係高唔係大隻,如果長曲髮嘅宋慧喬做左我女友 (小編心諗:係咪諗多左),企我隔離會搞到我好似細路咁,突顯唔到我 man 嘅一面好嫁嘛 (下刪 500 字講自己嘅優點)…

#6 韓國國民女神秀智

Mercy Beauty: 眼前 4 個髮型,邊個最吸引到你?點解?

Tim (37 , 法律顧問) 梗係左上長直髮啦!仲洗諗?

Mercy Beauty: 你會唔會因為條裙嘅關係所以揀左上呀?

Tim: 咁唔多唔少實有影響嘅…但係左下真係唔多得,好似中學生咁,右上我都 ok,不過個人對長直髮嘅女仔特別情有獨鍾嘅!右下太似我以前個補習老師,斯文得滯。

#7 Hyuna 泫雅

Mercy Beauty: 眼前 4 個髮型,邊個最吸引到你?點解?

Ken (37 , 醫生) 你問錯人啦,我對濃妝豔抹、染髮染到五顏六色嘅女仔完全無興趣嫁!四張相都咁濃妝,好難揀喎 (小編心諗: 依家叫你揀老婆咩)!如果一定要揀,我揀左上囉!長直髮點都順眼啲嘅,右下真係完全接受唔到!

#8 Blackpink  - Lisa

Edward (39 , 公務員) 唔知點解我覺得佢向個樣有啲似男人…有啲人妖 feel…一定要揀,我揀左上長直髮啦,似番個女仔。我個人唔太鍾意化濃妝嘅女仔,本身靚,唔洗化都靚!同埋,染髮黎講,少少 highlight 我 ok,但全個頭染金色我就唔太接受到。

調查總結:

結果好明顯,8 個受訪男人,個揀長髮,只有 個鍾情中長髮 (其實都係屬於長髮啦) !雖然我哋女仔都會認為日本女星新垣結衣及綾瀨遙留短髮你係最靚嘅,而且感覺比較時尚,不過受訪男性都你係會回你一句:「嚮街望同做女友,係兩回事,可以有兩套唔同標準嫁。」從以上小小調查,小編嘅感覺係:「我地女仔覺得老土,男人就認為清純。」唔怪得人地話 “Men are from Mars, Women are from Venus” ,真係完全溝通唔到。

雖然今次小調查得出如此結論,但小編就認為,不論長直髮、曲髮、波浪髮 、及膊髮、超短髮,一個能夠令自己顯得有自信嘅髮型最重要。衛蘭都有唱「十個他不如你一個」,揾到 1 個懂得真心欣賞你嘅男人,比得到 10 個同你核心價值完全唔同嘅男人更可貴呀,姊妹!